Бұл біздің балабақшадағы шығармашылық алаң.

Біздің тәрбиеленушілердің ой-өрісін, шығармашылық қабілеттерін дамытуға арналған маңызды орта. Бірінші қабатта орналасқан шығармашылық алаңның үнемі жұмыс жасап тұруы, балалардың ұйымдастырылған іс-әрекеттері немесе еркін уақытта жасаған шығармашылық жұмыстарының көрсетілуі, олардың мотивациясын арттыруда үлкен рөл атқарады.

Шығармашылық алаң – балалардың өздерін шығармашылық тұрғыдан көрсетуіне мүмкіндік беретін ерекше орын. Мұнда балабақшадағы барлық іс-шараларға қатысқан немесе еркін шығармашылықпен айналысқан балалардың жұмыстары ілініп тұрады. Бұл алаң балаларға өз еңбектерін бағалауға мүмкіндік беріп қана қоймай, олардың өз шығармашылығына деген қызығушылықтарын арттырады. Әрбір бала өз туындысын көріп, оны басқалармен бөлісе алады. Осылайша, балаларда шығармашылыққа деген ынта-жігер, өзін-өзі дамытуға деген ұмтылыс пайда болады.
Балалардың өз жұмыстарын көргенде немесе басқалардың жұмыстарын бағалағанда, олар өзін ерекше, маңызды тұлға ретінде сезінеді.

Шығармашылық алаңдағы жұмыстарды көру оларды жаңа жобалар жасауға ынталандырады. Әрбір баланың туындысының көрнекі түрде қойылуы, оны өзгелердің көруі балаға үлкен қуаныш пен мақтаныш сезімін береді. Бұл мотивацияны арттырып, балалардың өз қабілеттерін одан әрі жетілдіруге деген талпынысын күшейтеді.

Мысалы, сурет салу, қолөнер, мүсіндеу жұмыстары балалардың жеке ерекшеліктері мен талғамдарын ашуға ықпал етеді. Алаңда тұрған әрбір жұмыс балаға өз күшін сынауға, өз идеяларын жүзеге асыруға мүмкіндік береді.